صفحة زماني

... صفحة زماني ...

تقول ما عمري عرفت أكذب بـ يوم
وكل شيّ ٍ بصدري ... يقوله لساني

حتّى إن بغيت تبان في وجهي رسوم
وأخاف وأرجع ! واعترف في ثواني

هذا .. هو أوّل شي .. هي قالته يوم
فيها ألتقيت ... ووقتها كنت أعـاني

بسّ الأكيد ... أسلوبها حيل مهضوم
قبل احتويه .. بكلّ صـدق احتواني

أسلوبها .. ما أجامل إن قلت معدوم
لا تقول لي هيفا .. وريم .. وتهاني

النّاس كوم ... وذيـك بالحالها كوم
تجعل من المظلوم ... ظالم وجاني

صمت الحروف ! اتّمتم الها ومعلوم
دام الحروف .. تعيش في جوّ ثاني

ضاع الخفوق .. وما على خافقي لوم
سكران من كاس الهوى وما رواني

وسكرة جنون العشـق ما عقبها نوم
ألا سهر ليل .. وقصايد .. وأغاني

منطوقها اللي شدّني ! وجيت ملزوم
لمعانق حروفٍ .. بها أحلى المعاني

دخّلّني بـ عالم ! به الشوق مرسوم
وبعثر لي أوراقي ... ولخبط كياني

لين اسلبت قلبٍ .. من الوقت مهموم
واستوطنت بالرّوح وأقصى المحاني

ولقيت نفسي .. في بحر حبّها أعوم
كذا بـدون شعور ... حظّي رماني

في حبّها .. والحبّ لي صار مقسوم
يوم النصيب يصيب ! والوقت فاني

عشقتها عامين .. بس ما اكبر اللوم
أعطي خفوق ٍ ... فيه حلو الأماني

بيدين من تالي بها صرت مصدوم
حين انكشف لي بالهوى ما خفاني

لعيونها ضحّيت .. من طيب وسلوم
وفـ المقابل ... خانت أصدق حناني

وبأسبـابها عيني .. جفت لذّة النّوم
أسهر .. وأعاتب طيفها .. لا دعاني

صادق غلا .. بالحيل وافي لها دوم
وشلون ! تجرح من عشقها بـ تفاني

ما عاد باقي .. في سما حبّنا نجوم
((ياللي تركتيني .. وقلبك نساني))

يكفي .. تعبت جروح والآم وهموم
خلاص ! ما عدت احتمل جرح ثاني

هـدّ التعب .. قلبٍ يعاني ومحروم
ينزف عذابه .. فوق صفحة زماني

صفحة زماني

صفحة زماني

تعاليق