ذكّرتني ياجارح وهاضت اشجان ..

ابدى بذكر الرب رزّاق الانسان = ربٍ كريمٍ يفرح ابعبد تايب
سبحانه اللي منشي ابحور واكوان = ربٍ خلق حورٍ حسانٍ كعايب
ومن عقب ذكر الرب سطّرت قيفان = فيها معاني واضحة للبايب
حي الذي نادى بصوته ياصدقان = يبغى المشوره يوم شاف العجايب
امفارق الخلان يا شيخ نوعان = نوعٍ و نوعٍ مختلف بالتعايب
فيه الذي ترجيه في كل الاحيان = لازال باقي فوق نبت الشعايب
هذا تجوّد فالامل لازم ايبان = لابد مايظهر وتنسى العقايب
والنوع الاخر مايعوّد وفنيان = في وسط لحدٍ فوق قبره نصايب
مايرجع ابدنياك لو كان ماكان = ولو احرقت خدك دموعٍ سكايب
ماله ياغير الصبر والصبر الايمان = اصبر على المكتوب وارج الثوايب
وفي عالم الاحباب ملزوم الاحزان = لابد مايرحل احدهم وغايب
كم واحدٍ عايش بدنياه ضيمان = على خليلٍ صار تحت الترايب
ذكّرتني ياجارح وهاضت اشجان = والجاش جوفه مشتعل باللهايب
ذكّرتني شخصٍ عزيزٍ وسمحان = فؤاده ابيض حاز زين النجايب
ذكّرتني وقتٍ صفا لي ابخلان = من قبل ما اشوف العجب والغرايب
من قبل مايرحل سلايل كحيلان = رفيقي اللي مامشى فالمعايب
نويت بالقيفان نظمٍ ورثيان = الصاحب اللي فقدته لي نحايب
واليوم انا في بحر عيني وغرقان = اغرقني كثر الدمع والقلب هايب
ومالوم عينٍ تصطفق دمعها بان = ومالوم نفسي لو غديت ابدبايب
انا الحزين اللي من الحظ مرضان =ماعمر حظي لي صفا من شوايب
انا وحظي والمتاعب لنا شان =راضي وقانع بالقدر والكتايب
وياجارح اليا شفت حظك تعيبان = اضرب تاهتيه الخطر لا تهايب
قطع البحور اخير من ذل شجعان = واخير من عيش العنا والعقايب
وياللي نخيتوا صوتكم صرت سمعان = لاباس يا جارح وللجرح طايب
ادع الكريم اللي جمع شمّل الاثنان = يعقوب ويوسف عقب وقت النشايب
ادعه يرد اللي غدا راح لهيان = ادعه يكافيكم فجيع المصايب
ادعه عسى غيمتك تمطر من امزان = ويجعل ديارك خضر عقب الصبايب
ويصبح بها وردٍ عطورٍ وريحان = ويلاعبك بالوصل طير الرعايب
وادعه عسى حظك بعد شين يزدان =و لازان حظك شفت منه الكسايب
هذي بيوتٍ من ضميري و نقيان= نقيتها من هاجسي جيت جايب
وياجارح ابغى اقول بالفمّ مليان = والنعم فيكم ياعطاب الضرايب
واختامها صلوا عدد إنس ٍ وجان = على النبي قاهر ظروف النوايب
واعداد من صلى وبا لبيت طوفان = واعداد ماهبت نسايم هبايب

ذكّرتني ياجارح وهاضت اشجان ..

ذكّرتني ياجارح وهاضت اشجان ..

تعاليق