حوار مع التدخين

ممكن حضرتك تطفي السيجارة
# ليه في حاجة
ــ أصل التدخين ممنوع
# ليه هو احنا في مترو الإنفاق ولا في سينما
ــ التدخين ممنوع في كل مكان
# ليه بقي
ــ ربنا اللي قال كده
# ونعم بالله
# بس في كتير بيدخنوا ومنهم ناس لها احترامها يعني كلهم غلط
ــ طيب مش الخمر حرام
# ايوة
ــ في ناس لها احترامها زي مابتقول بتشربها نشربها احنا كمان
# لا
ــ ليه
#
عشان ربنا قال " يَا أَيُّهَا الَّذِينَ آمَنُواْ إِنَّمَا الْخَمْرُ
وَالْمَيْسِرُ وَالأَنصَابُ وَالأَزْلاَمُ رِجْسٌ مِّنْ عَمَلِ
الشَّيْطَانِ فَاجْتَنِبُوهُ لَعَلَّكُمْ تُفْلِحُونَ (90)" [المائدة]

ــ ما شاء الله ما أنت جبت المفيد
# ازاي
ــ الخمر حرام ليه
# لانها بتسكر الإنسان وتذهب عقله
ــ طيب و زيها الدخان يسكر الإنسان ويذهب عقله
# لا لا ما بيحصلش حاجة من دي
ــ طيب براحة
ــ في اول مرة شربت فيها دخان حسيت بأيه
# حسيت بشعور غريب كأني فرحان ودماغي في وادي تاني
ــ وبعدين مرة في مرة خدت عليها وما بقتش تحس بكده
# صح
ــ طيب اللي بيشرب خمره في أول مرة بتكون حالته في الضياع ومرة بعد مرة ولا عشر كاسات يأثروا معاه
# كلام مظبوط
# بس برضه مش مقتنع بأنه حرام
ــ طيب
ــ فلوسك بتخلص علي الدخان ولا لا
# لا الحمد لله معايا فلوس بتكفينا وازيد
ــ طيب لما ربنا اعطاك فلوس تكفيك وازيد تضيعها علي الدخان
ــ مش ده يبقي اسمه تبذير وربنا بيقول {...ولا تبذر تبذيراً إن المبذرين كانوا إخوان الشياطين...} [الإسراء 27]
ــ وكمان ربنا هيسأك أنت صرفت المال اللي رزقك بيه في ايه وأنت بتولع في الفلوس دي
# ما هو
ــ ما هو ايه مش ده صرف فلوس علي الفاضي
ــ لا ده كمان بتصرف فلوسك في حاجة بتضرك قبل أي حد تاني
# الله اكبر ما الواحد صحته زي البمب اهيه
ــ يا عم ربنا يحفظك
ــ يعني انت كأنك مش عايز الصحة دي وبتدمرها
# لا ازاي
ــ طيب تعرف ايه هي اضرار التدخين
# بيسوس السنان
ــ بس كده ده انت غلبان اوي
ــ خد عندك (( سرطان الرئة - ضيق الشعب الهوائية وتمدد الرئة - جلطة القلب - أمراض الفم والأسنان )) وغيرها كتير
# ايه يا عم ده كله
ــ ومش بس كده ده نسبة الاصابة بالامراض بتزيد عند الشخص المدخن

ده جدول

الــمــرض : تصلب الشرايين
احتمال الإصابة لغير المدخن : 1
للمدخن : 2
نسبة الوفيات من المرض نتيجة التدخين : 25-43 %

المرض : الجلطة القلبية
احتمال الاصابه لغير المدخن : 1
للمدخن : 5
نسبة الوفيات نتيجه التدخين : 75-80 %

المرض : سرطان الرئة
احتمال الاصابه لغير المدخنين : 1
للمدخنين : 10
نسبة الوفيات نتيجه التدخين : 80- 85 %

المرض : ضيق الشعب الهوائية
احتمال الاصابه لغير المدخنين : 1
للمدخنين : 6
نسبه الوفيات نتيجه التدخين :80-90%

المرض : الغرغرينة
احتمال الاصابه لغير المدخنين : 1
للمدخنين : 9
نسبة الوفيات نتيجه التدخين : 90-98%

الوفيات نتيجة لمختلف أنواع السرطان
لغير المدخنين : 1
للمدخنين : 2
نسبة الوفيات نتيجه التدخين : 30%

# ده كله
ــ شفت بقه
# لا كده الواحد يفكر في الموضوع
ــ طيب اعمل في حسابك ان الرسول – صلي الله عليه وسلم – قال (( لاضرر ولا ضرار ))
# يعني ايه
ــ الضرر انك تضر نفسك والضرار انك تضر غيرك
ــ وانت بتعمل الاتنين بالدخان
# لا حول ولا قوة الا بالله
ــ لا وكمان الرسول – صلي الله عليه وسلم – قال ((من قتل نفسه بشيء عذب به يوم القيامة )) [متفق عليه]
ــ ايه رايك في الدخان بقي
# والله هو كده شكله حرام
ــ مش شكله هو حرام وكمان مفتي الديار المصرية أصدر بيان بحرمته واعتقد انك لمحته كتير
# ايوة
# طيب ازاي ابطل الدخان
ــ ممكن عن طريق شوية حاجات
# زي ايه
ــ مش ساعات بتكون مضايق وطهقان
# كتير
ــ ايه اول حاجة بتعملها
# اولع سيجارة
ــ لا المرة دي بدل ما تولع السيجارة اشرب شوية ليمون او لبن يهدي اعصابك
# هو انا عيل
ــ خلاص ياعم اشرب فنجان قهوة
ــ المهم ما تولعش السيجارة
# عملت كده ومفيش فايدة
ــ اتصل بواحد صاحبك او الهي نفسك في أي حاجة تضيع الفكرة دي من دماغك
# الوقت بيبقي متاخر وما ينفعش اتصل بحد
ــ ممكن تنزل تتمشي شوية وتشرب حاجة ساقعة
# مش بقولك الوقت بيبقي متاخر انزل ازاي
ــ خلاص قول لنفسك هاولع السيجارة بعد نص ساعة
ــ كل ما تحس انك عايز تولعها قول كمان شوية
# وبعد الشوية ما يخلصوا
ــ ما انت ما تسبش نفسك لغاية ما يخلصوا اشغل نفسك بحاجة مفيدة
# زي ايه
ــ اقرا في أي كتاب وانشغل مع الموضوع بتاعه
# ما بحبش القراءة
ــ اسمع شريط يكون بيكلم عن حاجة مفيدة
# طيب وانا فشلت برضه
ــ افتكر جو رمضان وانت صايم
# ازاي يعني
ــ
حسس نفسك كانك في رمضان وانت صايم وبيكون نفسك في كوبية مياه والدنيا حار
نار وما بتفكرش حتي تشربها وانت في عز الحاجة لها وبتقول انا صايم , اعمل
كده مع السيجارة وقولها ان صايم عنك لغاية ما اموت
# وان كنت بالليل
ــ افتكر لما بتكون في المترو او في أي مستشفي
# وان ما عرفتش برضه
ــ ابعد عن أي حاجة تخليك تدخن
# زي ايه
ــ بعض اصاحبك اللي بيدخنوا او الاماكن اللي بتدخن فيها زي القهاوي
# وان فشلت بعد ده كله
ــ خد قرار واحد وانك مش هتدخن تاني
# وان ما عرفتش و انت عارف الشيطان
ــ مين اللي خلق الشيطان
# ربنا طبعا
ــ طيب استعن بالله عليه وهو هيبعده عنك
# ازاي
ــ بكل بساطة قول (( أعوذ بالله من الشيطان الرجيم ))
# بالبساطة دي
ــ ايوة بالبساطة دي
# طيب
ــ ايه مالك شكلك مش مستريح
# خايق ما أقدرش
ــ لا إن شاء الله هتقدر
# خايف
ــ اصبر واستعن بالله
ــ استعن بالله
# لا إله إلا الله
ــ محمد رسول الله
# صلي الله عليه وسلم

حوار مع التدخين

حوار مع التدخين

تعاليق